47 нафар ходимга иш ҳақи тўламаган раҳбарнинг хизмат машинаси хатланди
Фуқаролик ишлари бўйича Шаҳрисабз туманлараро судининг ижро варақаларига асосан Китоб туманидаги муассасадан 47 нафар ходимларнинг иш ҳақи ва унга тенглаштирилган тўловларини ундириш белгиланган. Мазкур ижро ҳужжатлари Бюронинг Китоб туман бўлими иш юритувига келиб тушган. Бўлим давлат ижрочиси томонидан ижро иши юритишни қўзғатиш тўғрисида қарор қабул қилиниб, тарафларга маълум қилинган. МИБнинг маълум қилишича, ижро ҳаракатлари давомида қарздор ижро ҳужжати талабларини бажариши тўғрисида огоҳлантирилишига қарамасдан қарздорлик бартараф этилмаганлиги туфайли, бўлим ходимлари томонидан мажбурий ижро ҳаракатларига киришилган. Олиб борилган мажбурий ижро ҳаракатлари давомида қарздор ташкилот раҳбарининг хизмат автомашинаси хатлаб олинди.
