Қарши шаҳар, Косон ва Муборак тумани ИИБ бошлиқларига кескин интизомий жазолар қўлланилди

Ўзбекистон Республикаси Ички ишлар вазирлигида янги раҳбар тайинланганидан сўнг тизимда кенг кўламли ўзгаришлар амалга оширилмоқда. Хусусан, Ички ишлар вазирининг буйруғи билан Қашқадарё вилояти Ички ишлар бошқармаси таркибида қатор раҳбарлар лавозимидан озод этилди, айримларига эса интизомий жазо чоралари қўлланилди.

Ички ишлар тизимида интизом ва самарадорликни ошириш мақсадида қуйидаги раҳбар ходимлар эгаллаб турган лавозимларидан озод этилди:

 • Вилоят ИИБ Маънавий-маърифий ишлар ва кадрлар билан таъминлаш хизмати бошлиғининг ўринбосари,

 • Вилоят ИИБ Йўл ҳаракати хавфсизлиги хизмати бошлиғининг маънавий-маърифий ишлар бўйича ўринбосари,

 • Рўйхатдан ўтказиш ва имтиҳон олиш бўлими бошлиғи,

 • Кукдала ва Китоб туманлари ИИБ бошлиқлари,

 • Косон ва Касби туманлари ИИБ бошлиқларининг биринчи ўринбосарлари,

 • Муборак тумани ва Қарши шаҳри ИИБ жамоат хавфсизлиги хизмати бўйича ўринбосарлари. 

Мазкур лавозим ўзгаришлари Ички ишлар вазири томонидан тизимдаги камчиликларни бартараф этиш ва ислоҳотларни жадаллаштириш мақсадида амалга оширилган. 

Бундан ташқари, хизмат фаолиятида йўл қўйилган камчиликлар сабаб қуйидаги раҳбарларга кескин интизомий жазо чоралари қўлланилди:

 • Вилоят ИИБ бошлиғининг жамоат хавфсизлиги бўйича ўринбосари,

 • Тергов бошқармаси бошлиғи,

 • Жамоат тартибини сақлаш бошқармаси бошлиғи,

 • Йўл ҳаракати хавфсизлиги қидирув-суриштирув бўлинмаси бошлиғи,

 • Касби тумани ИИБ бошлиғи ва унинг маънавий-маърифий ишлар бўйича ўринбосари, 

 • Қарши шаҳар, Косон ва Муборак туманлари ИИБ бошлиқлари. 

Тизимдаги бу каби кескин ўзгаришлар янги Ички ишлар вазирининг муросасиз позицияси ва ислоҳотларга бўлган қатъий ёндашуви натижаси сифатида эътироф этилмоқда. 

Янги раҳбарият ички ишлар органларида тартиб-интизомни мустаҳкамлаш ва фуқароларга хизмат кўрсатиш сифатини оширишга алоҳида эътибор қаратаётгани таъкидланмоқда. 

Шунингдек, Шаҳрисабз тумани ИИБ Эксперт-криминалистика гуруҳида 28 йил давомида бенуқсон хизмат кўрсатган катта эксперт майор Хусниддин Рустамов “подполковник” махсус унвони билан, Деҳқонобод тумани “Мустақиллик” маҳалласида намунали хизматни ташкил этган профилактика инспектори капитан Лутфулла Хамидов муддатидан олдин “майор” махсус унвони билан тақдирландилар, шунингдек ўн икки нафар раҳбар ходимлар “пул мукофоти” билан рағбатлантирилдилар.

Янги лавозим тайинловлари ва келгуси ўзгаришлар юзасидан расмий маълумотлар кутиляпти. Воқеалар ривожини кузатишда давом этамиз..