«Қарши нефть базаси» МЧЖнинг 6 нафар ходими ишдан олинди

1946

«Қарши нефть базаси» МЧЖ да «Ўзбекнефтгаз» АЖ Бошқаруви раиси Меҳриддин Абдуллаевнинг топшириғига кўра, молиявий ва комплаенс назорати йўналишида коррупция, иқтисодий жиноятларга қарши курашишга қарши йиғилиш ўтказилгани маълум қилинмоқда.  

Текширув натижаларига кўра, нефть маҳсулотларининг сақланиши, истеъмолчиларга етказиб берилиши, дебиторлик, кредитор қарздорликлар билан боғлиқ кўплаб ноўрин харажатлар, шунингдек, амалдаги қонунчиликка риоя қилинмаслик ҳолатлари аниқланган. 

Хусусан, жамият ва унинг филиаллари раҳбарияти ҳамда муттасади ходимларининг ўз вазифаларига совуққонлик билан ёндошуви, шунингдек, маҳсулотларни амалдаги қонунчиликка зид равишда тўловсиз бериб юборилиши оқибатида 2021 йил 1 январь ҳолатига нисбатан жами дебитор қарздорликларни 21 млрд 213 млн сўмга ортишига йўл қўйилган.

Бунда:

  • «Қарши нефть базаси»да (филиалларсиз) 9 млрд 257,4 млн сўмга ошган;
  • Косон филиалида 10 млрд 553,1 млн сўмга ошган;
  • Ғузор филиалида 1 млрд 386,5 млн сўмга ошган.

Шунингдек, «Қарши нефть базаси» МЧЖда сақланаётган нефть маҳсулотлари хатловдан ўтказилиб, бухгалтерия қолдиқлари билан солиштирилганда “Қишлоқ хўжалигида бозор механизмларининг кенг жорий этиш чора-тадбирлари тўғрисида”ги 149-сонли қарорининг бандларига зид равишда жами 9 та ФЁТШда 1 млрд  286 млн сўмлик 130 135 литр нефть маҳсулотлари истемолчиларга тўловсиз, рухсатномалар, ҳисоб-маълумотномалар расмийлаштирмасдан етказиб берилгани маълум бўлган. 

Ўрганиш даврида истемолчилардан пул маблағлари туширилиб жами 895,7 млн сўмлик нефть маҳсулотлари қиймати қопланди.

Ҳудди шундай, Яккабоғ филиалига қарашли 3 та ФЁТШда жами 1 млрд 162 млн сўмлик 130 254 литр нефть маҳсулотлари истемолчиларга тўловсиз рухсатномалар, ҳисоб-маълумотномалар расмийлаштирмасдан етказиб берилган ва камомад ҳолатига йўл қўйилган. Истемолчилардан пул маблағлари туширилиб, камомад тўлиқ қопланган. 

Нефть базанинг Косон филиали маҳсулотлар омборида ўтказилган  хатловда жами 80,5 млн сўмлик 11,0 тонна Аи-80 автобензиндан камомад аниқланиб, жавобгар шахс томонидан қопланиши таъминланган. 

Ушбу филиалнинг ФЁТШлардаги мавжуд товар моддий бойликлари хатловдан ўтказилганда, жами 16 та ФЁТШда 15,4 млн сўмлик товар моддий бойликлар яроқсиз ҳолатга келтирилганлиги аниқланган.

Шунингдек, 2015-2017 йилларда ходимларнинг харид қилинган намунали уй-жойлардан бўлган 10,7 млн сўм қарздорлигини вақтида ундириш чоралари кўрилмаган.

Аниқланган хато-камчиликларни бартараф этиш, уларни келгусида йўл қўйилишини олдини олиш мақсадида «Ўзбекнефтгаз» АЖнинг тегишли департаментлари ва нефтъ база жамоаси иштирокида «Қарши нефть базаси» МЧЖда кенгайтирилган йиғилиш ўтказилиб, муҳокама қилинган.

Ўрганишлар натижасига кўра, «Қарши нефть базаси» МЧЖнинг хато-камчиликларга йўл қўйган жами 28 нафар масъул мансабдор шахсга нисбатан қатъий интизомий чоралар кўрилди, шундан 6 нафар ходим билан тузилган меҳнат шартномалари бекор қилинган. 

Шу билан бирга, 22 нафарига нисбатан интизомий жазо чоралари қўлланилган. Хатоликларни бартараф қилиш, келгусида йўл қўймаслик, тегишли ҳуқуқий баҳо бериш ва талон-тарожликларни камайтириш юзасидан зарур чора-тадбирлар белгилангани маълум қилинган.

Javob qoldiring:

Please enter your comment!
Please enter your name here